Şu gün, 18-nji sentýabrda AFK-nyň Çempionlar ligasynyň toparçalaýyn bäsleşiginiň çäginde güýç synanyşýan toparlaryň – “Ahal” bilen “Al-Feýhanyň” resmi wekilleriniň hem-de şu oýna dahylly resmi adamlaryň gatnaşmagynda oýnuň öňýanyndaky ýygnanyşyk geçirildi.

Şeýle-de, ýygnanyşygyň dowamynda ertirki oýunda toparlaryň meýdança çykjak köýnekçeleri mälim edildi. “Ahal” topary ýer eýesi hökmünde adaty ak, “Al-Feýha” topary bolsa narynç köýnekçede çykyş eder. Ýygnanyşygyň yzysüresi “Aşgabat” stadionynyň konferens zalynda duşuşyga gatnaşýan toparlaryň baş tälimçileriniň hem-de oýunçylarynyň gatnaşmagynda metbugat ýygnanyşygy geçirildi. 

AFK-nyň Çempionlar ligasynyň toparçalaýyn bäsleşiginiň çäginde geçiriljek duşuşykda “Ahal” bilen Saud Arabystanynyň “Al-Feýha” toparlarynyň arasyndaky duşuşygyň 19-nji sentýabrda Aşgabat şäherindäki “Aşgabat” köpugurly stadionynda geçirilýändigini ýatladýarys.  Bu duşuşyk 21:00-da başlanar.