Türkmenistanly kuraş ussatlary şu gün Hançžou şäherinde geçýän ХIХ tomusky Aziýa oýunlarynda üçünji medaly gazandylar. Göreşiň bu görnüşi boýunça ýaryşyň soňky gününde topara bürünç baýragy Işanmyrat Ataýew getirdi. Ol bu üstünligi medal ugrunda 9 türgeniň bäsleşýän 90 kilograma çenli agram toparynda gazandy.

Çärýek final bolup çykan ilkinji bäsleşikde Işanmyrat Duşenbe şäherinde geçirilen Aziýa çempionatynyň 81 kilograma çenli agram toparyndaky 31 ýaşly bürünç medalçysy Min Kwan Buini (Wýetnam) 5:0 hasabynda ýeňdi.

Ýarym finalda ildeşimiziň garşydaşy güýçli eýranly pälwan Sadeh Azäräng boldy. Işanmyrat onuň bilen iki gezek: şu ýyl Aziýa synag çempionatynda we Hançžou şäherinde geçen «World Series Pro» saýlama ýaryşynda duşuşypdy. Iki gezegem ýeňşi bir duýduryşyň hasabyna Sadeh Azäräng belledi.

Ykbal bu gezegem eýranla gülüp bakdy. Ýarym finalda, şeýle hem finalda 41 ýaşly Miňýu Kimden (Koreýa Respublikasy) şeksiz üstün çykmak bilen, Sadeh Azäräng 34 ugur boýunça 289 türgeniň gatnaşýan Aziýa oýunlarynda Eýran topary üçin dördünji altyn medaly gazandy. Kümüş medal Miňýu Kime ýetdi. Iki bürünç medal bolsa Haknazar Nazarowa (Täjigistan) we Işanmyrat Ataýewe berildi.

30-njy noýabrda 27 ýaşy dolýan Işanmyrat Ataýew üçin bu ýaryş kuraş göreşi boýunça 2 ýylyň dowamynda diňe bäşinji halkara bäsleşikdi. Ol geçen ýyl Türkiýäniň Iznik şäherinde geçirilen IV Bütindünýä çarwa oýunlarynda üçünji ýeri eýeledi. 2023-nji ýylda Hançžou şäherinde geçirilen Aziýa synag çempionatynda we «World Series Pro» saýlama ýaryşynda bürünç medal gazandy. Mundan başga-da, şu ýyl Işanmyrat gazak kuraş göreşinde bilini synap gördi we Jizakda geçen Aziýa çempionatynda 3-nji ýeri eýeledi.

Birnäçe ýylyň dowamynda Işanmyradyň sporty Aşgabat şäherindäki 55-nji orta mekdepde bedenterbiýe mugallymy käri bilen üstünlikli utgaşdyryp alyp barandygy bellärliklidir. Ýakynda bolsa ol Arkadag şäheriniň Bedenterbiýe we sport komitetine usulyýetçi hökmünde işe kabul edildi.

Bürünç medal gazanandygyna garamazdan, I.Ataýew ýarym finalda eýranlydan ýeňilmegine gaty gynandy.

«Altyn medal gazanyp, ýurdumyzyň sport abraýyny has-da belende galdyrmak islegim güýçlüdi» diýip, Işanmyrat Ataýew ýaryşdan soň «AA»-nyň Hançžou şäherinde geçýän Aziýa oýunlaryndaky ýörite habarçysyna aýtdy.

Sylag gowşurylyşdan soň geçirilen metbugat ýygnagynda Işanmyrat 23 – 28-nji noýabrda Aşgabatda geçiriljek dünýä çempionatynda eýranly bilen ýene bir gezek synanyşyp, ondan üstün çykjakdygyna söz berdi.

Şeýlelik bilen, ХIХ tomusky Aziýa oýunlarynyň meýilnamasyndaky kuraş boýunça ýaryşlar tamamlandy. Özi-de, Şýaoşan Linpu gimnaziýasynda geçirilen ýaryşyň üç gününde Türkmenistanyň Döwlet baýdagynyň üçünji gezek galdyrylmagy bilen tamamlandy. Ondan öň toparymyzdan Tejen Tejenowyň (90 kg-dan ýokary) kümüş medal, Aýnur Amanowanyň (52 kg çenli) bürünç medal gazanandygyny ýatladýarys.

Hünärmenleriň pikiriçe, bu tälimçiler Dörtguly Tejenow bilen Şirin Kubaýewanyň önjeýli işiniň netijesidir. Dörtguly bary-ýogy iki ýyl ozal Türkmenistanyň erkekler toparyna ýolbaşçylyk edip başlady, Şirin bolsa Lebap welaýatynda gowy kuraş mekdebini döredip, ençeme ýyl bäri ýurdumyzyň zenanlar toparyna ýolbaşçylyk edýär.

Şirin Kubaýewa tanymal türgen. Ol köp ýyllaryň dowamynda dünýä sport sahnasynda ýurdumyzyň abraýyny üstünlikli gorap, köp sanly halkara ýaryşlarda ýeňiji boldy we baýrak aldy.

«Men tälimçiligi halaýaryn. Sport meniň ganymda bar» diýip, Ş.Kubaýewa aýdýar. Onuň atasy-da, kakasy-da kuraş bilen meşgullanyp, toý pälwanlarynyň arasynda köp baýrak gazanan adamlar.

Şirin Permanownanyň aýtmagyna görä, onuň şägirdi, ХIХ tomusky Aziýa oýunlarynyň bürünç medalçysy Aýnur Amanowanyň ganynda-da sport bar, onuňam ata-babasy köp ýyllap toýlarda göreş tutupdyrlar.

«Diýmek, biziň üstünliklerimiz ýöne ýerden däl» diýip, Şirin Kubaýewa ýeňişleriniň syryny açdy.

Hytaýdan gaýdyp gelenlerinden soň türkmen kuraşçylary öz ýurdumyzda geçiriljek dünýä çempionatyna güýçli taýýarlyk görüp başlarlar. Şol ýaryşlarda türgenlerimiz mundan-da gowy çykyş ederler diýip ynanýarys.