26-nji noýabrda ýurdumyzyň Naýbaşy futzal ligasynyň, jemleýji 21-nji tapgyrynyň duşuşyklary geçirildi.  

Onuň netijesinde “Migrasiýa” toparyndan 5:2 hasabynda üstün çykan “Deňizçi” topary çempionlyk derejesini gazandy. Geçirilen çempionatyň dowamynda 51 utuk toplan “Köpetdag” topary ýaryş tertibini ikinji orunda tamamlady. Bu tapgyryň çäginde “Turan” toparyndan 3:1 hasabynda ýeňlişe sezewar bolandygyna garamazdan, “Gümrükçi” topary çempionaty üçünji orunda tamamlady. Bu tapgyryň çäginde geçirilen ýene-de bir duşuşykda “Senagatbank” topary TNGIZT-den 5:4 häasabynda üstün çykdy.

Baýrak gowşurylyş dabarasynda çempionatyň dowamynda öňe saýlananlar sylaglandylar. Şeýlelikde, çempionatyň iň ökde oýunçysy diýlip “Deňizçi” toparynyň ezber oýunçysy Abdylla Nursähedow öňe çykdy. “Iň ökde derwezeçi” ugrunda A.Nursähedowyň topardaşy Meretgeldi Baýramow öňe saýlandy. “Köpetdag” toparynyň oýunçysy Mülkaman Annagulyýew “Iň köp top geçiren oýunçy” diýen ugurda öňe saýlanan bolsa, Timur Gulmyradow çempionatyň “Iň ökde emini” diýlip yglan edildi.

Ýeňijilere baýraklary TFF-niň Futzal bölüminiň başlygy Annanur Gulow bilen TFF-niň Tehiniki bölüminiň başlygy Berdimyrat Nurmyradow gowşurdylar.

 

“Migrasiýa” – “Deňizçi” – 2:5

TNGIZT – “Senagatbank” – 4:5

“Gümrükçi” – “Turan” – 1:3