«Arkadag» futbol toparynyň oýunçylary goşa ýeňiş gazandylar: olar finalda geçen ýyldan bäri kubok eýesi, iki gezek AFK çempionlar ligasyna gatnaşan «Ahaldan» 3:0 hasabynda ynamly üstün çykmak bilen, milli birinjiligiň altyn medalyna Türkmenistanyň Kubogyny-da goşdular.

Ähmiýeti boýunça ikinji derejeli klub kubogyny dört gezek alan «Ahal» topary üçin bu eýýäm ýaryşlaryň taryhynda ýedinji, şu ýylyň aprel aýynda döredilen «Arkadag» topary üçin bolsa ilkinji finaldy.

Final ýolunda «Ahal» Türkmenbaşynyň «Şagadamyny» iki gezek (öz meýdançasynda – 4:1; myhmançylykda – 3:0) ýeňdi we iki duşuşygyň jemine görä, «Merwden» güýçli çykdy (Maryda – 1:1; Aşgabatda – 1:0). «Arkadag» topary bolsa Türkmenistanyň Kubogynyň deslapky tapgyrynda iki gezek Marynyň «Energetiginden» 4:0 hasabynda üstün çykdy, soň çärýek finalda paýtagtyň «Köpetdagyny» iki gezek ynamly (garşydaşyň meýdançasynda – 5:1; öz meýdançasynda – 4:1) ýeňdi, ýarym finalda bolsa AFK-2018 kubogynyň finalçysy «Altyn asyry» iki oýunda-da (myhmançylykda – 4:1; öz meýdanynda – 4:0) utdy.

Kubok oýnuna çenli «Arkadag» topary bilen «Ahal» topary Türkmenistanyň çempionatynyň çäginde üç gezek oýnady. Üç oýunda-da «Arkadag» topary ýeňiş gazandy: 5:2, 3:2 we 2:1.

2023-nji ýyldaky Türkmenistanyň Kubogynyň soňky oýny-da «Arkadag» toparynyň ep-esli artykmaçlygynda geçdi. Onda hasap 29-njy minutda Abdy Bäşimowyň ýakyn aralykdan takyk beren pökgüsi bilen açyldy. 52-nji minutda çep burçdan berlen topy Abdy Bäşimow kellesi bilen urup, ikinji goly tora saldy we ýaryşa birinji gezek gatnaşýan toparyň artykmaçlygyny 2:0-a ýetirdi. 68-nji minutda bolsa «Ahalyň» oýunçysynyň säwliginden soň Ilýa Tamurkin topy eýeläp, garşydaşyň jerime meýdançasyna girdi we derweze meýdançasynyň çep çüňkünden ony derwezäniň uzakdaky ýokarky burçundan tora garşylyksyz saldy.

Duşuşygy ýeňşe ýetiren «Arkadag» toparynyň oýunçylary bir möwsümde ikinji baýraga eýe boldular. Döwlet ähmiýetli adybir şähere degişli topary bu üstünlige öň Türkmenistanyň milli ýygyndy toparynyň tanymal hüjümçisi bolan, Groznyý şäheriniň «Terek» toparynyň düzüminde Russiýanyň 2003/2004 ýyllar kubogyny, «Balkanyň» düzüminde AFK 2013-iň prezidentiniň kubogyny alan 43 ýaşly Wladimir Baýramow alyp bardy.