Gündogar sebitiň oba hojalykçylary şu oba hojalyk ýylynda 130 müň gektar ýerde gowaça ekip, ondan bol pagta hasylyny almaklygy meýilleşdirýärler. Welaýatyň görseň gözleriňi dokundyrýan gowaçaly meýdanlary sebitde ekinlere ideg etmek işleriniň guramaçylykly ýola goýlandygyna, işleriň agrotehnikanyň talaplaryna laýyk alnyp barylýandygyna şaýatlyk edýär.

Gowaçalaryň kadaly boý almagynda we bol hasyly kemala getirmeginde bu möhüm tehniki ekini öz wagtynda kada laýyk suwarmak işlerine aýratyn orun degişlidir. Hut şonuň üçinem welaýatda gowaçalara suw tutmak işleriniň daýhançylyk däplerine görä ýola goýlandygyny, akabalary, ekerançylygyň arasyndaky ýaplary arassalamak çäreleriniň yzygiderli geçirilýändigini, bu ugurda kuwwatly tehnikalaryň, ýagny, ekskowatorlaryň, gum itekleýjileriň doly güýjünde ulanylýandygyny bellemek bolar.

Geçirilýän bu çäreler özüniň oňyn netijelerini hem berýär. Häzirki wagtda welaýat boýunça 3-nji ösüş suwuny tutmak işleri tamamlanyp, gowaçalary 4-nji gezek suwarmaklyk guramaçylykly dowam etdirilýär. Şeýle hem ýokary öndürijilikli tehnikalaryň we kämil oba hojalyk gurallarynyň hem-de tirkegleriniň netijeli peýdalanylmagy arkaly gowaçaly meýdanlarda 5-nji hatarara bejergi işleri tamamlaýjy tapgyrda alnyp barylýar. Gowaçalara ideg etmekde «Lebapobahyzmat» önümçilik birleşiginiň we olara degişli etraplardaky «Obahyzmat» önümçilik kärhanalarynyň mehanizatorlarynyň yhlasly zähmet çekýändiklerini, bu ugurda hem işleriň sazlaşykly ýola goýlandygyny bellemek buýsançlydyr.

Mehanizatorlardan tutanýerli zähmeti, ýokary ussatlygy talap edýän bu möhüm agrotehniki çäräniň ýokary hil derejesinde geçirilmegi bolsa, gowaçanyň hasyllylygynyň ýokarlanmagyny üpjün edýär. Gündogar sebitiň gowaçaly meýdanlarynda alnyp barylýan guramaçylykly işler Gündogar sebitiň pagtaçy daýhanlarynyň 2024-nji «Pähim-paýhas ummany Magtymguly Pyragy» ýylyny bol pagta hasylyny kemala getirip, zähmet üstünliklerine beslejekdiklerine bolan ynamyňy berkidýär.