Türkmenistanyň futbol çempionatynyň 32-nji tapgyryna badalga berlip, onda «Arkadag» hem-de «Merw» toparlary duşuşdylar. Paýtagtymyzdaky Nusaý stadionynda geçirilen duşuşykda döreden mümkinçiliklerini ýerlikli peýdalanan «Arkadag» topary garşydaşyndan 5:0 hasabynda üstün çykdy. Arkadag şäheriniň adybir toparyna ýeňiş getiren toplary Didar Durdyýew, Begmyrat Baýow, Şanazar Tirkişow (2) hem-de Begenç Akmämmedow geçirdiler.

Ýeňişli ýörişi dowam edýän «Arkadag» topary gazanan bu ýeňşinden soň utugyny 87-ä ýetirdi. Wagtyndan öň çepionlyk derejesini gazanan «Arkadag» topary futbol çempionatymyzda ýene-de bir duşuşyk geçirer. 30-njy tapgyryň senesi süýşürilen duşuşygynda «Arkadag» toparynyň garşydaşy paýtagtymyzyň «Altyn Asyr» topary bolar. 

Futbol çempionatymyzda ikinji, üçünji orunlary degişlilikde “Ahal” hem-de “Altyn Asyr” toparlary eýeleýärler.

Şu gün futbol çempionatymyzyň 32-nji tapgyrynyň çäginde ýene-de iki duşuşyk geçiriler – «Aşgabat» – «Nebitçi», «Şagadam» – «Ahal». Bu tapgyrda geçirilmeli ýene-de bir duşuşygyň senesi («Altyn Asyr» – «Köpetdag») başga wagta geçirildi.

 

Gollar: 21 Didar Durdyýew, 32 (11 m.j.u.) Begmyrat Baýow, 61, 73 Şanazar Tirkişow, 65 Begenç Akmämmedow («Arkadag»)

Duýduryşlar: 63 Abdy Bäşimow, 67 Resul Hojaýew («Arkadag») – 23 Kemal Annamuhammedow, 63 Maksat Atagarryýew, 81 Merdan Durdymuhammedow, 85 Şöhrat Öwmadow («Merw»)

Geçirilen ýeri: «Nusaý» stadiony (Aşgabat ş.)

Duşuşygyň emini: E.Annamyradow (Balkanabat ş.) 

Kömekçi eminler: S.Gurbanow (Balkanabat ş.), H.Abdiýazow (Daşoguz ş.)

Ätiýaçdaky emin: H.Gurbanow (Aşgabat ş.)

Gözegçi emin: G.Öwezow (Aşgabat ş.)