Türkmenistanyň Medeniýet ministrligi bilen Mary welaýat häkimliginiň guramagynda Gadymy Merw topragynyň dürli ýerlerinde Türkmen döwlet Gurjak teatrynyň sahna oýunlary görkezilýär. 20-nji fewralda Mary topragyna gelen myhman artistler Mary, Wekilbazar, Türkmengala, Baýramaly etraplarynda, şeýle-de, Mary şäherindäki Kemine adyndaky döwlet drama teatrynda myhmançylykda bolup, gülküli sahna oýunlaryny görkezdiler. 

“Janly gurjaklar” sahna oýunlary bilen çykyş edýän artistler şu gün Sakarçäge etrabynyň Medeniýet öýünde sagat 18:00-da körpeleriň göwnüni götererler. Fewral aýynyň 28-ne çenli bu ýerde sahna oýunlary bilen tomaşaçylara hezil berjek gurjak teatrynyň artistleri Murgap, Ýolöten, Garagum etraplarynda-da bolarlar. 

Dynç güni günüň birinji ýarymynda 10 artistden düzülen topar Ýolöten etrabynda ýerleşýän “Maýyplar öýünde” çagajyklaryň göwnüni götermek üçin hem-de haýyr-sahabat etmek üçin mugt sahna oýnuny görkezerler. Şeýle-de, artistler Mary şäherindäki Kemine adyndaky döwlet drama teatrynda şol günüň ikinji ýarymynda, has takygy, sagat 16:00-da çagalar üçin “Janly gurjaklar” sahna oýnuny, 18:00-da bolsa, ulular üçin “Gülküli agşamyny” görkezerler.