Marynyň «Merw» futbol topary Gyrgyzystandan Oş şäheriniň «Alaý» topary bilen ähmiýeti boýunça Aziýanyň klublar ýaryşynda ikinji derejeli – AFK-nyň Kubogy-2023/24 ýaryşynyň deslapky tapgyrynda duşuşar. Aziýa futbol konfederasiýasynyň habaryna görä, oýun 15-nji awgustda Türkmenistanda geçiriler.

«Alaý» Gyrgyzystanyň iň baýry we abraýly futbol toparlarynyň biridir: ol 4 gezek çempion (2013, 2015, 2016 we 2017), iki gezek Kubok eýesi (2013, 2020), häzirki üç gezek Naýbaşy kubogyň ýeňijisi (2017, 2018, 2023) we milli çempionatyň kümüş medalynyň (2022) eýesidir.

Mundan öň «Alaý» AFK Kubogy ugrunda ýaryşda dört gezek: 2016-njy ýylda - deslapky tapgyryň utulan-çykdy tapgyrynda we 2014, 2017 we 2018-nji ýyllarda - ýaryşyň toparlaýyn tapgyrynda çykyş etse-de, hiç wagt topardan çykyp bilmedi.

Türkmenistanyň çempionatynyň häzirki bürünç medalynyň eýesi «Merw» 17 ýyldan soň ähmiýeti boýunça Aziýanyň klublar ýaryşynda ikinji derejeli – AFK-nyň Kubogy ugrunda ikinji gezek synanyşar. «Merw» 2006-njy ýylda SK «Dempo» (Hindistan) we «Al-Nasr» (Oman) toparlary bilen bir toparda oýnap, topar tapgyryndan geçip bilmändi.

«Merw» bilen «Alaý» 29 ýyl mundan ozal indi geçirilmeýän Aziýa Kubogynyň eýeleriniň Kubogy ýaryşynyň çäklerinde bir gezek duşuşypdylar. 1994-nji ýylda Jambulda geçirilen saýlama tapgyryň çäklerinde Türkmenistandan, Gyrgyzystandan, Täjigistandan («Rawşan»), Özbegistandan («Pahtakor») we Gazagystandan («Taraz») bäş topar bäsleşigiň indiki tapgyryna çykmaga ýeke-täk hukuk ugrunda göreşipdiler, şonda «Merw» «Alaýy» - 3: 1 hasabynda ýeňipdi.

«Merw» – «Alaý» oýnunyň ýeňijisi 22-nji awgustda AFK kubogy-2023/24 ýaryşynyň utulan-çykdy tapgyrynda Täjigistanyň çempionatynyň bürünç medalynyň eýesi «Hujand» bilen duşuşar.

AFK Kubogy ýaryşynyň deslapky we utulan-çykdy tapgyrlarynda bir oýun geçiriler.

Deslapky tapgyrda we AFK Kubogy ýaryşynyň utulan-çykdy oýunlarynda üstünlik gazanan halatynda «Merw» futbol kluby «Altyn asyr» ( Türkmenistan), «Rawşan» (Täjigistan) we «Abdyş-Ata» (Gyrgyzystan) toparlary bilen birlikde AFK Kubogy-2023/24 ýaryşynyň 20-nji sentýabrda başlap 14-nji dekabrda tamamlanýan Merkezi zolakda ýaryşyň topar tapgyrynda oýnamaga hukuk gazanar. Diňe toparyň ýeňijisi ýaryşyň indiki tapgyryna çykar.