Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Saud Arabystany Patyşalygyna amala aşyran saparynyň çäklerinde, 30-njy iýunda Katar Döwletiniň Emiriniň ýörite wekili Hadi bin Ali Al Marri bilen duşuşdy.

Duşuşygyň dowamynda ýörite wekil hajy Arkadagymyza Katar Döwletiniň Emiriniň gutlaglaryny we mähirli sözlerini ýetirdi diýip, TDH habar berýär.

Bellenilişi ýaly, duşuşygyň dowamynda Türkmenistanda ýaýbaňlandyrylan giň möçberli özgertmeleriň çäklerinde ýurdumyzy durmuş-ykdysady taýdan okgunly ösdürmäge gönükdirilen täze taslamalaryň hem-de maksatnamalaryň durmuşa geçirilýändigini belläp, Gurbanguly Berdimuhamedow bu babatda ikitaraplaýyn gatnaşyklary giňeltmegiň ägirt uly geljeginiň we mümkinçilikleriniň bardygyna ünsi çekdi. Şeýle-de Gurban aýynyň mukaddes günlerinde keramatly toprakda duşuşmagyň köp ýyllaryň dowamynda ýola goýlan hyzmatdaşlygyň we mizemez dost-doganlygyň nyşany bolup durýandygyny, Türkmenistanyň Katar Döwleti bilen özara bähbitli gatnaşyklary ösdürmäge ähmiýet berýändigini aýtdy.

Duşuşygyň ahyrynda Türkmenistan bilen Katar Döwletiniň arasyndaky özara bähbitli hyzmatdaşlygyň mundan beýläk-de berkidiljekdigine ynam bildirildi.