Aziýanyň Futbol konfederasiýasynyň 2024 ― 2025-nji ýyllaryň futbol möwsüminden başlap, yklymyň klublaýyn ýaryşlarynda özgertmeleri girizendigini, indi klublaýyn ýaryşlaryň iki däl-de, üç boljakdygyny habar beripdik. Konfederasiýa wekilçilik edýän federasiýalaryň we assosiasiýalaryň häzirki reýting tertibine garap, merkezi aziýaly sport žurnalisti Aleksandr Troiskiý Täjigistanyň «Sports.tj» saýtynda 2025 ― 2026-njy ýyllaryň futbol möwsüminde Merkezi Aziýa wekilçilik edýän toparlaryň haýsy ýaryşlara gatnaşjakdygy barada düşündiriş berdi.

Oňa görä, häzir Günbatar sebitde 10-njy orny eýeleýän Türkmenistan ýene iki möwsümden yklymyň ikinji derejeli ýaryşyna ― Çempionlar ligasy ― 2-ä iki topar bilen gatnaşyp biler. Häzir reýtingde 17,052 utugy bolan Türkmenistanyň 2024-nji ýyldaky çempiony 2025 ― 2026-njy ýyllaryň futbol möwsüminde Çempionlar ligasy ― 2-niň toparçalaýyn tapgyryndan özüne ýer alyp biler. Ýurduň kubogynyň eýesi bolsa toparçalara girmek üçin saýlama duşuşyklaryny geçirmeli bolar. Eger ikinji topar hem saýlama duşuşyklardan üstünlikli geçip bilse, Türkmenistan şol möwsümde ÇL ― 2-de iki topar bilen wekilçilik eder. Ýurduň ikinji topary toparçalara girmegi başarmasa, onda ol yklymyň üçünji derejeli ýaryşynyň ― Çagyryş ligasynyň toparçalaýyn tapgyryna girer.

«Merwiň» AFK-nyň kubogynyň saýlama tapgyryndaky goşa üstünligi yklym ýaryşlarynyň 2023 ― 2024-nji ýyllardaky möwsümi üçin Türkmenistana 0,300 utuk bagyşlady. Edil häzir Türkmenistan 9-njy orundaky Hindistandan 2,600 utuk çemesi yzda.

Indi janköýerleri gyzyklandyrýan esasy sowala jogap bermek isleýäris. Türkmen toparlary AFK-nyň Elita Çempionlar ligasyna nähili gatnaşyp bilerler? Munuň üçin olaryň Günbatar sebitiň reýtinginde azyndan altynjy orna çenli göterilmegi gerek. Çünki altynjy orundaky döwlet yklymyň birinji derejeli ýaryşyna häzirki wagtda diňe bir topar ― ýurduň çempiony bilen gatnaşyp bilýär.

Ýagdaýa has anyk göz ýetirmek üçin AFK-nyň klublar reýtinginiň häzirki ýagdaýyny paýlaşýarys: