Şu gün, 29-njy iýulda  AFK-nyň PRO derejeli tälimçilik okuwynyň jemleýji, 7-8-nji modullaryna badalga berildi. Jemleýji modullary 15-njy awgusta çenli dowam etjek tälimçilik okuwynyň dowamynda gatnaşyjylar nazaryýet hem-de tejribe sapaklaryny geçerler. Tälimçilik okuwynyň nazaryýet sapaklary “Ýyldyz” myhmanhanasynda, tejribe sapaklary bolsa “Aşgabat” köpugurly stadionynda geçirilýär. Tälimçilik okuwynyň ilkinji alty modullarynyň geçen ýylyň dowamynda hem-de şu ýylyň başyna eçirilendigini ýatladýarys.

 Tälimçilik kursy UEFA-nyň gözükdirijisi, moldowaly Genadiý Skurtulyň ýolbaşçylygynda geçirilýär. 

Tälimçilik okuwy nazaryýetdir tejribe sakaklaryny öz içine alyp, oňa ýerli tälimçileriň 15-si gatnaşýar (ýurdumyzyň futbol çempionatyna gatnaşýan toparlaryň hem-de ýygyndy toparymyzyň tälimçileri).

Ýeri gelende bellesek, AFK-nyň PRO derejeli tälimçilik okuwyny 2023-nji ýylyň 21-nji awgusty bilen 2024-nji ýylyň 15-nji awgusty aralygynda geçirmekligiň meýilleşdirilendigini bellemek gerek. Dört tapgyrda geçirilýän tälimçilik okuwy 8 moduldan ybarat bolar. 

Tälimçilik okuwynyň soňunda bellenilen synaglary üstünlikli tabşyranlarа AFK-nyň  PRO derejeli tälimçilik ygtyýarnamasy gowşurylar.