Şu gün, 17-nji oktýabrda Türkmenistanyň futzal boýunça zenanlar ýygyndysy 2025-nji ýylda maý aýynda Hytaý Halk Respublikasynda geçiriljek Aziýa kubogynyň saýlama tapgyryndaky topardaşlaryny öwrendi. Bije çekişlik AFK-nyň Kuala-Lumpur şäherindäki (Malaýziýa) ştab-kwartirasynda geçirildi. Bije çekişlige 19 ýygyndy gatnaşdy.

 

Bije çekişligiň netijesinde üç sany bäş ýygyndyly we bir sany dört ýygyndyly toparçalar emele geldi. Saýlama tapgyryň duşuşyklary geljek ýylyň 11 ― 19-njy ýanwary aralygynda merkezleşdirilen görnüşde geçiriler. Bu duşuşyklaryň netijesinde her toparçada öňdäki iki orny eýelän we üçünji orny eýelänleriň hem iň gowy ýygyndysy yklym ýaryşynyň final tapgyryna gatnaşar. Hytaý ýer eýesi hökmünde, Eýran bilen Ýaponiýa bolsa 2018-nji ýyldaky yklym ýaryşynyň finalçylary hökmünde saýlama duşuşyklara gatnaşmaýar.

 

Bije çekişligiň netijesinde türkmen ýygyndysy «C» toparçada düşdi. Bu toparçada Türkmenistanly futzalçy zenanlardan başga-da, ýer eýeleriniň ― Özbegistanyň, Awstraliýanyň, Filippinleriň we Kuweýtiň ýygyndylary bar.

 

 

«A» toparça: Tailand (ý.e.), Liwan, Bahreýn, Palestina, Yrak;

«B» toparça: Indoneziýa (ý.e.), Gonkong, Pakistan, Hindistan, Gyrgyzystan;

«C» toparça: Özbegistan (ý.e.), TÜRKMENISTAN, Awstraliýa, Filippinler, Kuweýt;

«D» toparça: Wýetnam, Taýwan, Makao, Mýanma (ý.e.).

 

Ýeri gelende aýtsak, dokuz ýygyndy ― Awstraliýanyň, Hindistanyň, Yragyň, Kuweýtiň, Gyrgyz Respublikasynyň, Mýanmanyň, Pakistanyň, Palestinanyň we Filippinleriň ýygyndylary yklym ýaryşyna ilkinji gezek gatnaşmak üçin synanyşýarlar. Mundan ozal 2015-nji we 2018-nji ýyllarda geçirilen yklym ýaryşlarynyň ikisinde hem Eýranyň ýygyndysy çempion bolupdy.

 

Yklym ýaryşyndan öň oňa gatnaşmaga hukuk gazanan 12 ýygyndy üçin ýene bir gezek bije çekiler. Olar yklym ýaryşynda dört toparça bölünerler. Yklym ýaryşynda öňdäki üç orny eýelän ýygyndylar geljek ýylyň ikinji ýarymynda Filippinlerde geçiriljek zenanlaryň arasyndaky ilkinji Dünýä kubogynda wekilçilik ederler.

Taýýarlan: 

Sükeýman Allaberdiýew