27-nji dekabrda Türkmenistanyň Futbol federasiýasynyň Arkadag şäheriniň bilim müdirligi bilen bilelikde guramagynda Arkadag şäherindäki orta mekdeplerde bilim alýan mekdep okuwçylaryň gatnaşmagynda geçirilen futzal bäsleşiginiň jemleri jemlenildi.

Ýaş derejeleriniň ikisinde geçirilen bäsleşigiň jemleri boýunça 6-7-nji synpda okaýan okuwçylaryň arasynda birinji orny Arkadag şäherindäki 2-nji orta mekdebiň 1-nji topary eýeledi. Bu topar final duşuşygynda öz mekdepleriniň ikinji toparyndan üstün çykdylar. Bu ýaş derejesindäki bäsleşigiň duşuşyklary Arkadag şäheriniň 2-nji orta mekdebiň sport toplumynda geçirildi.

Duşuşyklary 3-nji orta mekdebiň sport toplumynda geçirilen 8-9-njy synplaryň arasyndaky bäsleşigiň jemi boýunça birinji, ikinji orunlary degişlilikde 3-nji orta mekdebiň 1-nji hem-de 2-nji toparlary eýelediler. 

Bäsleşigiň soňunda baýrakly orunlara mynasyp bolanlar Hormat hatlary hem-de medallar bilen sylaglandylar. Ýeňiji bolanlara Kubogy Türkmenistanyň Futbol federasiýasynyň Baş sekretary Serdar Geldiýew hem-de Arkadag şäheriniň bilim müdirliginiň başlygynyň orunbasary Şirmuhammet Berdiýew gowşurdylar.

Ýeňiji bolan toparlary hem-de gatnaşyjylary bäsleşikleriň üstünlikli tamamlanmagy bilen tüýs ýüregimizden gutlaýarys. Geçirilen bäsleşikler ýaş türgenleri gelejekde uly üstünliklere ýetmäge ruhlandyrjakdygyna ynam bildirýäris. Olaryň geljek ýylda hem uly ýeňişleri gazanmaklaryny arzuw edýäris. 

Arkadag şäherinde geçirilen futbol bäsleşikleriň ýurdumyzda sportuň beýleki görnüşleri bilen birlikde futboldyr futzala hem uly goldaw berilýändigini aýdyňlygy bilen görkezendigini bellemek gerek.