Aziýa Kubogy – 2025-iň saýlama tapgyryna taýýarlygynyň çäginde Türkmenistanyň futzal boýunça zenanlar ýygyndysy Özbegistanyň paýtagty Daşkent şäherinde türgenleşik işlerini geçirýär. 

Ýygyndy toparymyzyň türgenleşik işleri Daşkent şäherindäki Dokma we ýeňil senagat institutynyň sport toplumynda dowam edýär. Günde üç wagtyna geçirilýän türgenleşigiň dowamynda ýygyndy toparymyzyň oýunçylary goragdan hüjüme geçmek hem-de standart ýagdaýlaryny seljermek bilen meşgullanýarlar. 

Ýeri gelende bellesek, bije çekişligiň netijesinde ýygyndy toparymyz «C» toparçada Özbegistanyň, Awstraliýanyň, Filippinleriň we Kuweýtiň ýygyndylary bilen güýç synanyşmaga mümkinçilik aldy. 

Yklym ýaryşynyň saýlama tapgyrynyň «C» toparçasynyň duşuşyklary 11-19-njy ýanwary aralygynda merkezleşdirilen görnüşinde Özbegistanyň paýtagty Daşkent şäherinde geçiriler. 

Saýlama tapgyrynyň çäginde geçirilýän toparçalarda ilkinji iki orny eýelän ýygyndylar hem-de üçünji orny eýelän ýygyndylaryň iň gowy netije görkezeni Aziýa Kubogynyň final tapgyrynda çykyş etmäge mümkinçilik alar.

Milli ýygyndymyz saýlama tapgyryndaky ilkinji duşuşygyny 11-nji ýanwarda Awstraliýanyň ýygyndy toparynyň garşysyna geçirer.

Aziýa Kubogy – 2025-iň final tapgyry 2025-nji ýylyň maý aýynda Hytaýda geçirilmegi meýilleşdirilýär. 

 

15:00 Awstraliýa – Türkmenistan

15:00 Türkmenistan – Filippinler

15:00 Türkmenistan – Kuweýt

18:00 Özbegistan – Türkmenistan

 

Bellik: saýlama tapgyrynyň duşuşyklary Daşkent şäherindäki “Yunusobod Sports Complex” sport toplumynda geçiriler.