Ýakynda Aziýa Kubogynyň saýlama tapgyrynda çykyş eden toparçasyny ikinji orunda tamamlan Türkmenistanyň ýetginjekler ýygyndysynyň (U17) sylaglanyş dabarasy geçirildi.

Türkmenitanyň Magtymguly adyndaky Ýaşlar guramasynyň Merkezi geňeşiniň hem-de Türkmenistanyň Futbol federasiýasynyň bilelikde geçiren dabarada ýetginjekler ýygyndymyzyň wekilleriniň çykyşyna ýokary baha berildi. Dabaranyň soňunda ýaş futbolçylarymyza ýadygärlik sowgatlary gowşuryldy.

Ýeri gelende bellesek, Türkmenistanyň ýetginjekler ýygyndysy (U17) Aziýa Kubogy – 2023-iň saýlama tapgyrynyň jemi boýunça çykyş edýän “A” toparçasynda ikinji orny eýeledi.

Iordaniýanyň Zarka şäherinde merkezleşdirilen görnüşde geçirilen saýlama ýaryşyndaky ilkinji duşuşygynda Filippinleriň ýygyndy toparyny 2:0 hasabynda ýeňlişe sezewar eden ýetginjekler ýygyndymyz ikinji oýnunda siriýaly deň-duşlary bilen geçiren duşuşygyny 1:1 hasabynda deňlikde tamamlady. Özüniň üçünji oýnunda Ýaponiýanyň ýygyndysyndan ýeňlen ýetginjekler ýygyndymyz soňky oýnunda ýer eýeleri bilen 3:3 hasabynda deňme-deň oýnady.

Şeýlelikde, ýetginjekler ýygyndymyz geçiren duşuşyklarynda 5 utuk toplamagy başardy. Toparçalaýyn bäsleşigiň netijesi boýunça Iordaniýanyň hem-de Siriýanyň ýygyndylarynyň hem 5 utukdan toplandyklaryny bellemek gerek, ýöne goşmaça görkezijileriniň esasynda ýygyndy toparymyz garşydaşlaryny yzda galdyrdy.