Paýtagtymyzyň “Altyn Asyr” topary taryhynda sekizinji gezek ýurdumyzyň Naýbaşy kubogyny gazanmagy başardy.

Ýazguly Hojageldiýewiň tälim berýänleri şu gün geçirilen duşuşykda “Şagadamdan” üstün çykmagy başardylar. “Nusaý” stadionynda geçirilen duşuşykda “Altyn Asyr” garşydaşyny 3:1 hasabynda ýeňlişe sezewar etdi.

Ýeňiji bolan toparyň gollaryny Myrat Annaýew, Yhlas Toýjanow hem-de Altymyrat Anndurdyýew öz atlaryna ýazdyrdylar.

Bu duşuşygyň yzysüresi Türkmenistanyň futbol çempionatynyň geçen möwsüminde tapawutlanan futbolçylaryň hem-de tälimçiniň sylaglanyş dabarasy geçirildi. Futbol çempionatymyzyň jemi boýunça Begenç Akmämmedow (“Köpetdag”) “Iň ökde futbolçy” diýlip yglan edildi. “Ahalyň” baş tälimçisi Mergen Orazow “Iň ökde tälimçi”, bu toparyň derwezeçisi Resul Çaryýew bolsa “Iň ökde derwezeçi” diýlip saýlanyldy. Garşydaşlarynyň derwezesinden netijeli urgularyň 27-sini geçiren Didar Durdyýew (“Ahal”) iň köp top geçiren oýunçylaryň arasynda öňe saýlandy. “Feýr-pleý” baýragy bolsa “Merw” toparyna gowşuryldy. Gatnaşan duşuşyklaryny ynamly geçiren Resul Mämmedow geçen möwsümiň jemi boýunça “Iň ökde emin” diýlip saýlanyldy.

Ýeňiji bolan topara hem-de futbol çempionatymyzda öňe saýlanan futbolçylardyr, tälimçä baýraklary Türkmenistanyň Futbol federasiýasynyň başlygy Arslan Aýnazarow, TFF-niň başlygynyň orunbasary Şatlyk Orazgylyjow hem-de TFF-niň Baş sekretary Annabaýram Durdymämmedow dagy gowşurdy.

Naýbaşy Kubogy ugrundaky duşuşyk
“Altyn Asyr” – “Şagadam” – 3:1
Gollar: 32 (11 m.j.u.) Myrat Annaýew, 67 Yhlas Toýjanow, 76 Altymyrat Annadurdyýew (“Altyn Asyr”) – 3 Kerim Hojaberdiýew (“Şagadam”)
Duýduryşlar: 24 Hakmuhammet Bäşimow, 45+2 Yhlas Magtymow (“Şagadam”)
Geçirilen ýeri: “Nusaý” stadiony (Aşgabat ş.)
Duşuşygyň emini: Resul Mämmedow (Aşgabat ş.)
Kömekçi eminler: Berdimämmet Atdyýew (Tejen ş.), Myrat Nurberdiýew (Aşgabat ş.)
Ätiýaçdaky emin: Ýusup Jumamyradow (Aşgabat ş.)
Gözegçi emin: Şöhrat Durdyýew (Aşgabat ş.)