Kazanyň «Ak Bars» toparynyň ulgamynyň hokkeýçileri 17-23-nji aprelde «A» toparyň üçünji diwizionynda Günorta Afrikada geçiriljek dünýä çempionatyna taýýarlygyň soňky tapgyryna başlan Türkmenistanyň milli ýygyndysy bilen bilelikde okuw-türgenleşik ýygnanşygyny geçirmek üçin Aşgabada geldiler.

Türkmenistanyň Hokkeý federasiýasynyň başlygy Jora Hudaýberdiýewiň «AA»-nyň habarçysyna aýtmagyna görä, Russiýa Federasiýasynyň Tatarystan Respublikasynyň sport wekiliýetine 42 ýaşly Russiýanyň at gazanan sport ussady, Russiýanyň ýygyndy toparynyň hatarynda dünýäniň üç gezek çempiony, Gagarin Kubogynyň ýeke-täk bäş gezek eýesi Danis Zaripow ýolbaşçylyk edýär.

Türgenleşiklere 46 ýaşly ussat tälimçi, 1998-nji ýylda Kazanyň «Ak Barsynyň» düzüminde Russiýanyň çempiony bolan, 1995-nji ýylda geçirilen ýaşlar dünýä çempionatynyň kümüş medalyny eýelän Artýom Anisimow ýolbaşçylyk eder. Oňa derwezebanlar, goragçylar we hüjümçiler tälimçileri kömek edýärler.

7-nji aprelde, Bütindünýä saglyk güni, Türkmenistanyň milli ýygyndysy Kazanyň «Ak Bars» toparynyň hokkeýçileri bilen ýoldaşlyk duşuşygyny geçirer. Oýun Sportuň gyşky görnüşleri toplumynyň buz meýdançasynda agşam sagat 16:00-da başlanar.

Ol ýurdumyzyň hokkeýçileri üçin şu aýda Keýptaun şäherinde başlanýan «A» toparynyň üçünji diwizionynda dünýä çempionatyndan öň tejribeli garşydaş bilen oýunda öz güýjüni barlamaga amatly pursat bolar.

«B» toparyň ikinji diwizionyna çykmaga hukuk gazanmak üçin Lýuksemburg, Tailand, Taýwan, Türkmenistan we GAR döwletlerinden bäş topar bäsleşer.

Türkmenistanyň milli ýygyndysy 17-nji aprelde geçiriljek ilkinji oýunda çempionatyň meýdança eýeleri – GAR-yň topary bilen duşuşar. 18-nji aprelde Baýram Allaýarowyň türgenleri Lýuksemburgyň, 20-nji aprelde - Tailandyň we 23-nji aprelde Taýwanyň milli ýygyndylary bilen bäsleşerler.

Türkmenistanyň hokkeýçileri «A» toparynyň üçünji diwizionynyň dünýä çempionatynda iki gezek bürünç medal eýeläpdiler. Olar şeýle üstünlige soňky gezek geçen ýyl Lýuksemburgda geçirilen dünýä çempionatynda ýetipdiler.