Sportuň dürli görnüşleri boýunça tälim alýan türgenler birnäçe ýaryşlara gatnaşyp, öňdäki orunlara eýe bolýarlar. Şeýle ussat türgenleriň biri-de Eziz Amanmuhammedowdyr.

Eziz heniz bäş ýaşyndaka ökde futbolçy bolup ýetişmek arzuwynda bolýar. Eýsem, bu arzuw türgende nädip döredikä?! Futbola bolan gyzyklanmany türgende ilki atasy, soň bolsa kakasy döredipdir. Ýaş türgen olaryň topa erkin erk edişini görüp, özi hem geljekde şeýle türgen bolmagy maksat edinip, 6 ýaşyndan bäri sport mekdebine gatnap, ol ýerde tälim alýar. Ol Mary şäherindäki ýöriteleşdirilen Olimpiýa ätiýaçlyk sport mekdebinde tälimçi Seýitmuhammet Mollaýewden sportuň inçe syrlaryny öwrenýär. Onuň esasy aýratynlygy ol hem topy çep aýagy bilen oýnamagy. “Çepbekeýiň çeni bolmaz, eden işiniň kemi bolmaz” diýlişi ýaly, Eziz sport mekdebiniň “Nesil” futbol toparynyň goragçysy bolup, uly üstünliklere eýe bolýar.

Şeýle-de, Eziz Mary şäherindäki iňlis dili we ynsançylyk ugurlary boýunça okuw dersleri çuňlaşdyryp öwredilýän welaýat mekdebiniň 6-njy synpynda okap, okuw derslerinden 4-5-lik bahalary alýar. Sapaklar bilen bir hatarda sporta hem üns bermegi onuň zehininiň ýokarydygyny aýan edýär.

Eziz bilen söhbetdeş bolan wagtymyzda, “Geljekde kim bolasyň gelýär?” diýip soranymyzda, ol “Nesip bolsa, ulalyp, mekdebi tamamlasam, Messi ýaly tanymal futbolçy bolasym gelýär” diýip, özüne uly ynam bilen jogap berdi.

Biz hem ýaryşlarda “Nesil” toparynyň ýeňiş gazanmagy üçin öz goşandyny goşan ussat goragçy Eziz Amanmuhammedowa geljekde uly üstünlikleriň hemra bolmagyny, arzuwlarynyň wysal bolmagyny arzuw edýäris.