Arkadag Serdarly bagtyýar ýaşlar ýylynyň aprel aýynyň soňky ýekşenbesinde bellenilip geçilen Türkmen bedewiniň milli baýramy meniň ömrümde iň üýtgeşik, tolgundyryjy, kalbymy lerzana getiren baýram boldy. Baýramçylyk mynasybetli guralan dabaraly çärelere gatnaşmagym maşgala agzalaryma-da, işdeş ýoldaşlaryma-da şatlyk paýlady.

Baýramçylygyň esasy bir bölegi bolan at çapyşyklary Daşoguz welaýatynyň durky täzelenen atçylyk sport toplumynda geçirildi. Ýaz möwsüminiň açylýandygy mynasybetli meýilnama boýunça 8 çapyşyk geçirilip, iň soňky toparda halypa çapyksuwarlaryň arasynda toý bijesi atylyp, olaryň çapjak bedewleri belli edildi.

Meniň paýyma Edepli diýen ýyndam bedew düşdi.

Edepli 1000 metr aralykda beýleki bedewlerden bir gez öňe saýlanyp, pellehana 1 minut 8 sekuntda gelmegi başardy. Maňa bu ýeňşim üçin hormatly Prezidentimiziň baş baýragy — “Toyota Land Cruiser” ýeňil awtoulagy berildi.

Milli Liderimiziň ýadawsyz aladalary, Arkadagly Serdarymyzyň çäksiz tagallalary netijesinde türkmen bedewiniň şan-şöhraty äleme ýaň salýar, halypa-şägirtlik ýoly ösdürilip ýokary derejelere çykýar.

Goý, bize şeýle mümkinçilikleri döredip berýän alym Arkadagymyzyň, hormatly Prezidentimiziň janlary sag bolsun, bütin adamzat ähmiýetli tutýan tutumly işleri rowaç alsyn!