-
Mary welaýatynda TFF-niň eminleriniň gatnaşmagynda okuw-maslahaty geçirildi
20.11.2024 -
Türkmen samboçylary dünýä çempionaynda 6 medal gazandylar
20.11.2024 -
Sambo boýunça zenanlaryň arasynda Mary welaýatynyň birinjiligi geçirildi
20.11.2024 -
Türkmen tennisçileri —«Ashgabat Open 2024» halkara ýaryşynyň ýeňijileri!
20.11.2024 -
Basketbolçy gyzlar ýaryşdylar
18.11.2024
Sport
Kuweýt Döwletinde geçirilen Aziýanyň açyk ýaryşynda ýurdumyzyň dzýudoçylary kümüş we bürünç medal eýelediler
Kuweýt Döwletinde geçirilen Aziýanyň açyk ýaryşynda türkmenistanly dzýudoçylar iki medal gazandylar. Dünýäniň 27 ýurdundan 156 türgen (116 erkek we 40 zenan) iki günläp 14 baýrak toplumy ugrunda bäsleşdiler.
14 dzýudoçy (9 erkek we 5 zenan) wekilçilik eden toparymyzdan Mämmedaly Açyldyýew kümüş medal eýeledi. Türkmen döwlet binagärlik-gurluşyk institutynyň 1-nji ýyl talyby 90 kilograma çenli agram derejesinde şeýle üstünlik gazandy. Ýaryşda 11 ýurtdan 12 türgen iň güýçli adyny almak ugrunda bäsleşdiler.
Çärýek final hasaplanan ilkinji tutluşykda ildeşimiz maýyny bermän – dessine 17 sekuntda Jon Wiron Ferrerini (Filippinler) ippon (arassa ýeňiş) bilen ýeňdi. Ýarym finalda Ýuçul Kimden (Koreýa Respublikasy) üstün çykdy. Finalda welin Anarbek Işenbaýewden (Gyrgyzystan) asgyn gelip, kümüş medal eýeledi. Ýuçul Kim (Koreýa Respublikasy) we Wlad Wisan (Rumyniýa) bürünç medal gazandylar.
Bu 19 ýaşly Mämmedaly Açyldyýewiň halkara ýaryşlarynda gazanan ilkinji üstünligidir. Ol häzirki wagtda Gahryman Amandurdyýewiň we Omar Muhammetnazarowyň ýolbaşçylygynda Türkmenistanyň milli ýygyndysynda sport ussatlygyny kämilleşdirýär.
Maýsa Perdäýewa 57 kilograma çenli agram derejesinde bürünç medala mynasyp boldy we Türkmenistanyň toparyna ýene bir medali getirdi.
1/2 final tapgyrynda ilkinji tutluşykda Ýuna Şinden (Koreýa Respublikasy) ejiz gelen türgenimiz bürünç medal ugrundaky göreşde Ýamini Murýany (Hindistan) arassa ýeňip, hormat münberiniň üçünji gatyna çykdy. Ýene bir bürünç medala Fationa Kasapi (Kosowa) mynasyp boldy. Finalda ABŞ-dan Noran Elmanrukini ýeňen Koreýaly Ýuna Şin ýaryşyň ýeňijisi boldy.
Lebap welaýatynyň Köýtendag etrabynyň 20-nji orta mekdebiniň 10-njy synpynda okaýan 18 ýaşly Maýsa Perdäýewa halkara ýaryşlarynda üçünji gezek hormat münberine çykýar. Bir ýyl mundan ozal -- 2022-nji ýylda Gazagystan Respublikasynyň Almaty şäherinde geçirilen ýetginjekleriň arasynda Aziýanyň Kubogy ugrunda ýaryşda ýeňiş gazanypdy. Şu ýylyň mart aýynda Saraýewoda geçirilen ýetginjekleriň arasynda Ýewropanyň Kubogy ugrunda ýaryşda kümüş medal gazandy. Indi bolsa Kuweýtde geçirilen Aziýanyň açyk ýaryşynda bürünç medal eýeledi.
Şägirdiniň bu üstünliginde Maýsanyň ilkinji tälimçisi Jora Mätnazarowyň we häzirki halypalary, ýaşlar toparynyň baş tälimçisi Gülbadam Babamuradowanyň we milli ýygyndymyzyň baş tälimçisi Çemengül Geldibaýewanyň mynasyp paýy bar.
Dohada (Katar döwleti) başlanan 36-njy dünýä çempionaty Türkmenistanyň dzýudoçylary üçin indiki çynlakaý synag bolar, oňa bäş yklymyň 99 ýurdundan 657 (343 erkek we 314 zenan) türgen gatnaşar.
2023-nji ýyldaky dünýä çempionatynda Türkmenistanyň milli ýygyndysyna erkeklerden: Aýbek Ömirow, Hakberdi Jumaýew (ikisi hem 60 kilograma çenli agram derejesinde), Serdar Rahymow we Hekim Agamämmedow (ikisi hem 66 kilograma çenli), zenanlardan – Aksoltan Hojageldiýewa (48 kg çenli), Saýara Rozyýewa (52 kg çenli), Maýsa Perdäýewa (57 kg çenli) we Zülhumar Daşgynowa (63 kg çenli) ýaly sekiz dzýudoçy wekilçilik eder.
14-nji maýda tamamlanjak dünýä çempionatynyň umumy baýrak gaznasy 998 müň dollara barabardyr. Ýeňijiler 2024-nji ýylda Parižde geçiriljek Olimpiýa oýunlaryna gatnaşmaga hukuk gazanarlar.
