Ýurdumyzda bedenterbiýäni we sporty ösdürmek bilen bagly beýik işler giň gerime eýe bolýar. Sport bilen meşgullanmaga höwesek ýaşlaryň sanynyň ýylsaýyn artýandygy ýokarda ýatlanymyza şaýatlyk edýär. Guralýan ýaryşlar türgenlerimiziň ussatlyklaryny artdyrýandyklaryna şaýatlyk edýär.

Golaýda Murgap etrabyndaky sport desgasynda 2007-nji ýylda doglan futbolçy türgenleriň arasynda geçirilen ýaryşa 8 topardan ybarat 180 türgen gatnaşdy. Bäsleşik welaýatyň kubogyny almak ugrunda geçirilip, bu ýaryş ýaş futbolçylaryň oňa ýokary taýýarlykly gelendiklerini subut etdi. Emin agzalarynyň biragyzdan gelen kararyna laýyklykda 1-nji orna Mary şäherindäki 1-nji, 2-nji orna Mary şäherindäki 2-nji sport mekdepleriniň türgenleri, 3-nji orna bolsa, Mary şäherindäki 2-nji sport mekdebiniň ikinji toparynyň futbolçylary mynasyp boldular. Bu ýaryşda Mary şäherindäki 2-nji sport mekdebiniň türgeni Emir Annaýew “Iň ökde goragçy”, şu sport mekdebiniň türgeni Sungat Annaýew “Iň ökde ýarym goragçy”, Mary şäherindäki 1-nji sport mekdebiniň türgeni Alan Hudaýberdiýew bolsa, “Iň ökde hüjümçi” diýen atlara mynasyp bolmagy başardylar. Ýeňiş gazanan futbolçylara Hormat hatlary gowşuryldy.