Sportuň pauerlifting görnüşi boýunça Türkmenistanyň milli ýygyndy toparynyň baş tälimçi-mugallymy Döwletnazar Atanazarowyň toparynda yzygiderli türgenleşik geçip, milli ýygyndy toparynyň agzasy Ahmet Gurbanow 2022-nji ýylyň 30-njy sentýabryndan 02-nji oktýabryna çenli Amerikanyň Birleşen Ştatlarynyň Las-Vegas şäherinde geçirilen Dünýä Çempionatyna gatnaşyp 90 kg agramda çykyş edip, pauerliftingiň oturyp turmak görnüşinden 225 kg, ýatyp götermek görnüşinden 190 kg, ýerden bile çenli çekmek görnüşinden 235 kg derejesinde agramlyk daşyny göterip, 3 sany altyn medala mynasyp boldy. Mundan başga-da, Döwletnazar Atanazarowyň türgenleriniň ýene-de biri Bäşim Amanmyradow şol ýaryşa gatnaşyp altyn we kümüş medalynyň eýesi boldy.

Türkmenistanyň Çempionatlarynda, birinjiliklerinde, kuboklaryna gatnaşyp, baş tälimçi-mugallym Döwletnazar Atanazarowyň türgenleri baýrakly orunlara mynasyp bolýarlar.

Gelejekde hem Döwletnazar Atanazarowyň taýýarlaýan türgenleri sportuň pauerlifting görnüşinden Aziýa we Dünýä derejesinde geçiriljek ýaryşlara gatnaşyp, türkmen baýdagyny belende götererler diýip umyt edýäris. 

Ýurdumyzda okamaga, öwrenmäge, işlemäge şeýle ajaýyp mümkinçilikleri döredip berýän Milli Liderimiz Gahryman Arkadagymyzyň Arkadagly Serdarymyzyň janynyň sag, başynyň dik bolmagyny, il-ýurt, bütinadamzat ähmiýetli alyp barýan işleriniň rowaç bolmagyny arzuw edýärin.